Ippreżenta Applikazzjoni għal Trademark Internazzjonali Online

Biex taċċessa l-formola tat-talba għal IA, innaviga fis-sit web, billi ssegwi waħda mir-rotot taʼ hawn taħt:

• permezz taʼ eSearch, meta tintwera l-informazzjoni dettaljata taʼ EUTM(A), fit-taqsima ‘Azzjonijiet u komunikazzjonijiet’ hemm l-opzjoni tal-EUTM, ‘Talba għal Applikazzjoni Internazzjonali’;
• illoggja fil-‘User Area’ tiegħek. Ikklikkja fuq ‘Servizzi online’. Agħżel ‘Ippreżenta Applikazzjoni Internazzjonali’;
• permezz tas-‘sit web tal-EUIPO’ → Formoli u Preżentati → Formola għal Applikazzjoni Internazzjonali;
• permezz tas-‘sit web tal-EUIPO’ → Ċentru tal-Għajnuna → Servizzi Online → Preżentati Oħra → Formola għal Applikazzjoni Internazzjonali;
• ‘Ikkuntattjana’ — niżżel ʼl isfel sakemm tasal għal "Applikazzjoni u preżentata taʼ dokumenti magħna” u ser tara l-link għal ‘Formoli u preżentati’: mill-menu li jinżel ikklikkja fuq ‘Applika għal Applikazzjoni Internazzjonali’.

 

Kwalunkwe persuna fiżika jew ġuridika li jkollha kont tal-EUIPO tistaʼ tippreżenta IA.

Is-sistema tirrikonoxxi erbaʼ rwoli involuti fil-preżentazzjoni taʼ IA:

• Ir-rikjedent — Dan huwa l-persuna li tippreżenta talba għal IA u tistaʼ tkun kwalunkwe persuna fiżika jew ġuridika li jkollha kont tal-EUIPO.
• L-applikant/Is-sid — Dan hu l-persuna jew l-entità legali identifikata bħala l-applikant jew id-detentur taʼ dritt taʼ proprjetà intellettwali partikolari (IPR) u li diġà jkollu ID taʼ Sid tal-EUIPO. Id-data personali tas-sid tiġi importata mill-marka bażi fl-applikazzjoni. Matul it-talba għal IA, ir-rikjedent ma jkunx jistaʼ jżid, iħassar jew jimmodifika kwalunkwe applikant/sid jew id-dettalji tagħhom.
• Ir-rappreżentant — Dan huwa entità permessa biex taġixxi fʼisem sid, applikant jew partijiet terzi taʼ IPR. Ir-rappreżentant tal-EUIPO jistaʼ jiżdied fil-formola jew jitħassar minnha, iżda r-rikjedent ma jistax joħloq rappreżentant ġdid. Jekk ir-rappreżentant diġà ppreżenta applikazzjoni mal-EUIPO, hu/hi jkollu/jkollha numru tal-ID taʼ Rappreżentant tal-EUIPO.
• Ir-rappreżentant quddiem il-WIPO — ir-rikjedent jistaʼ jaħtar rappreżentant speċifiku quddiem il-WIPO, li fʼdak il-każ ir-rikjedent ikollu jimla d-data personali.

 

Referenza

Ir-Referenza Tiegħek

Ir-referenza tiegħek għandha tikkonsisti minn sa 30 karattru alfanumeriku, bl-użu tal-alfabet Ruman: a-z, A-Z, 0-9. Tużax spazji.

Din ir-referenza hija għall-użu intern tiegħek; għal kwalunkwe mistoqsija futura rigward it-talba tiegħek, jekk jogħġbok uża r-referenza uffiċjali tal-EUIPO.

Lingwi

Il-lingwa tal-EUIPO

Din hija l-lingwa li għażilt biex tippreżenta l-IA lill-EUIPO. Jekk it-talba għal IA titnieda wara li tintgħażel EUTM minn e-Search, bʼmod awtomatiku dan il-qasam ikun fih l-ewwel lingwa tal-marka. Tistaʼ tinbidel għal kwalunkwe waħda mit-23 lingwa uffiċjali tal-UE li biha tistaʼ tkun ippreżentata applikazzjoni.

Il-lingwa tal-WIPO

Din hi l-lingwa li ser tkun ippreżentata biha l-applikazzjoni tiegħek lill-WIPO. Tistaʼ tkun biss l-Ingliż, il-Franċiż jew l-Ispanjol.

Il-lingwa tal-korrispondenza mal-EUIPO

Tistaʼ tagħżel jekk il-lingwa tal-korrispondenza mal-EUIPO tkunx il-lingwa tal-EUIPO jew tal-WIPO.

Il-lingwa tal-korrispondenza mal-WIPO

Tistaʼ tagħżel bejn it-tliet lingwi tal-Protokoll taʼ Madrid: l-Ingliż, il-Franċiż u l-Ispanjol.

Traduzzjonijiet

It-traduzzjonijiet huma meħtieġa biss fejn l-applikazzjoni tiġi ppreżentata fʼlingwa differenti mil-lingwi tal-Protokoll taʼ Madrid (l-Ingliż, il-Franċiż, l-Ispanjol).

Jekk timmarka t-tieni opzjoni, jiġifieri, L-applikant jipprovdi traduzzjoni tal-lista taʼ prodotti u servizzi u l-elementi verbali fil-lingwa tal-WIPO, ikollok tippreżenta l-informazzjoni li ġejja fil-lingwa tal-WIPO, jekk applikabbli:

Kuluri kklejmjati, indikazzjoni tal-Kuluri, deskrizzjoni tal-Marka, Transliterazzjoni tal-marka, Ċaħda taʼ responsabbiltà.

EUTM/A bażika u dettalji tal-marka internazzjonali

IA tistaʼ tkun ibbażata fuq EUTM/A waħda jew ħafna EUTM/A(s). Fʼdin it-taqsima, tistaʼ jew iddaħħal in-numru tal-ID tal-EUTM(A) direttament jew tistaʼ tuża l-bażi taʼ data tal-eSearch tal-EUIPO biex issib l-EUTM(A)(s) bażiċi li jifformaw il-bażi tal-IA. Is-sistema turi d-dettalji bażiċi tal-entità magħżula u jekk iżżidha mal-formola, id-dettalji tal-marka internazzjonali jimtlew u jintwerew mal-informazzjoni relatata mill-marka.

Partijiet Kontraenti Indikati

Żid — tistaʼ żżid partijiet kontraenti kemm hemm bżonn fil-qasam ‘Partijiet kontraenti indikati’.

Meta żżid l-Istati Uniti bħala parti kontraenti indikata, fit-taqsima jintwera l-qasam ‘Intenzjoni għall-użu’, li tippermettilek ittella dokument mehmuż jew tindika li ser jiġi ppreżentat aktar tard.

Ħassar — tistaʼ wkoll tħassar partijiet kontraenti miżjuda preċedentement (kwalunkwe limitu relatat maʼ dik/dawk il-parti/partijiet kontraenti jitneħħa wkoll).

Prodotti u servizzi

Jekk tagħżel l-opzjoni Ir-reġistrazzjoni qed titfittex għall-istess prodotti u servizzi fl-applikazzjoni, in-numri tal-klassijiet u l-ispeċifikazzjoni taʼ prodotti u servizzi jkunu identiċi għal dawk fl-EUTM(A) bażika u ma jkunux jistgħu jiġu modifikat.

Jekk tagħżel l-opzjoni Ir-reġistrazzjoni qed titfittex għall-prodotti u s-servizzi li ġejjin fl-applikazzjoni, tkun tistaʼ:

• Tħassar klassi waħda jew aktar klassijiet. Sabiex tagħmel dan trid tikklikkja fuq is-simbolu x in-naħa taʼ fuq fix-xellug tan-numru tal-klassi.

• Immodifika t-termini inklużi fi klassi waħda. Tidher tfakkira tal-lingwa użata għall-edizzjoni tat-termini taħt kull numru tal-klassi wara l-għażla tal-utent fit-taqsima Lingwi.

Il-lista taʼ prodotti u servizzi tistaʼ tkun l-istess bħal fil-marka/marki bażika/bażiċi jew idjaq. Qatt ma tistaʼ tkun usaʼ mill-kamp taʼ applikazzjoni tal-protezzjoni tal-EUTM(A)(s).

Limitazzjonijiet

Din hi biex jintalbu limitazzjonijiet tal-lista taʼ prodotti u servizzi fir-rigward tal- partijiet kontraenti kollha jew taʼ xi wħud minnhom li għażilt.

Jekk tixtieq iżżid limitazzjoni, ikklikkja Żid Limitazzjoni u Agħżel il-parti(jiet) kontraenti fejn tixtieq tapplika l-limitazzjoni.

Tista’ tindika l-lista sħiħa limitata għal dik/dawk il-parti(jiet) kontraenti billi tagħżel il-klassijiet pertinenti kollha kif ġej:

Żid Klassi → Agħżel Klassi → Editja jekk meħtieġ → Issejvja.

Prijoritajiet

Jekk tixtieq tikklejmja prijorità tal-ewwel preżentata għall-istess trademark ippreżentata matul l-aħħar sitt xhur, agħżel l-‘Uffiċċju tal-Preżentati’ mil-lista li tinżel u:

• żid id-data tal-preżentazzjoni u n-numru tal-preżentazzjoni;
• agħżel li tikklejmja prijorità għall-klassijiet kollha jew xi wħud minnhom biss.

Jekk tagħżel l-opzjoni ‘Klassijiet magħżula’, tkun meħtieġ li tindika għal liema prodotti u servizzi tapplika l-klejm taʼ prijorità; bʼmod aktar speċifiku, ikollok l-opzjoni NeħħiKlassi jew Immodifikal-Prodotti u s-Servizzi li fiha.

Il-kalkolu tat-tariffa tal-WIPO

Tistaʼ tintroduċi l-informazzjoni relatata mal-ħlas tat-tariffi tal-WIPO. L-EUIPO jgħaddi l-informazzjoni lill-WIPO.

Ivvalida & Ippreżenta

Fʼdan l-istadju ser tara l-paġna tal-konferma li fiha d-dettalji tal-applikazzjoni kollha li tkun ser tippreżenta. Xorta tkun tistaʼ timmodifika d-data qabel tippreżentaha.

L-informazzjoni dwar il-firma hija obbligatorja. Huwa permess massimu taʼ żewġ firem. Billi tipprovdi l-informazzjoni dwar il-firma, tikkonferma li ċċekkjajt id-dettalji u li tixtieq tiffirma u tippreżenta l-formola tal-applikazzjoni.

Il-pass li jmiss huwa t-tieqa tal-ħlas fejn ser ikollok tagħżel il-metodu tal-ħlas għat-tariffa tal-immaniġġar tal-EUIPO.

Issejvja, Stampa u Rrisettja

Tista’ tagħmel ‘Issejvja’ l-formola tal-IA fil-‘User Area’ tiegħek. Meta tkun qed timla l-formola tal-applikazzjoni tiegħek, tista' tissejvja x-xogħol tiegħek fi kwalunkwe ħin bħala abbozz. Ikklikkja fuq ‘Issejvja l-Abbozz’ fil-kolonna tal-lemin tal-formola. L-abbozz jista' jiġi aċċessat mit-taqsima ‘Abbozzi’ fil-User Area tiegħek.

‘Issejvja d-data tal-formola fʼXML’ tippermettilek li tesporta l-informazzjoni fʼformat XML u li terġaʼ tużaha aktar tard bl-użu tal-opzjoni ‘Importa d-data mill-XML’

‘Stampa’ rieżami tal-formola tiegħek fi kwalunkwe ħin matul il-proċess tal-applikazzjoni.

‘Irrisettja’ — jekk trid terġaʼ tibda l-applikazzjoni tiegħek, ikklikkja ‘Irrisettja l-Formola’ u t-taqsimiet kollha li mlejt qabel jiġu żvujtati u l-informazzjoni titħassar.

Metodu u konferma tal-Ħlas

Tistaʼ tħallas it-tariffi tal-immaniġġar tal-formola IA bʼkarta taʼ kreditu, trasferiment bankarju, jew permezz taʼ kont kurrenti tal-EUIPO. L-EUIPO jipprovdi servizz online għad-detenturi taʼ kontijiet kurrenti li jagħti aċċess għat-tranżazzjonijiet u l-informazzjoni kollha tal-kont kurrenti tagħhom.

Jekk jogħġbok innota li jekk tiddeċiedi li tħallas bi trasferiment bankarju, huwa rrakkomandat li tieħu nota tal-kodiċi tat-tranżazzjoni tal-ħlas, għaliex dan ser jgħin jidentifika l-ħlas tiegħek. Tistaʼ ssib din ir-referenza fl-irċevuta li tistaʼ titniżżel li takkwista fl-aħħar.

Meta tikklikkja fuq “Ikkonferma l-ħlas”, l-applikazzjoni tiegħek ser tiġi sottomessa.

 

Meta jitlesta l-proċess taʼ sottomissjoni, ser tirċievi konferma li l-applikazzjoni tiegħek ġiet sottomessa bʼmod korrett, flimkien maʼ numru tal-applikazzjoni uffiċjali. Jenħtieġ li tuża dan in-numru tal-applikazzjoni għal kwalunkwe komunikazzjoni mal-Uffiċċju relatata mal-IA tiegħek.

Ser tkun meħtieġ ukoll tniżżel l-irċevuta uffiċjali u l-konferma tiegħek fʼfajl uniku PDF.

Għandu jiġi nnotat li l-Uffiċċju ma joħroġx kopji tal-irċevuti.